SEA BEASTS
A PELÍCULA
SINOPSE
Nunha pequena casa illada nunha costa remota, a carón dun mar violento, vive Amancio coa única compaña de Elvira, a súa nai viúva. Amancio é un home de mediada idade coa mente dun cativo. Cariñoso e imaxinativo, os seus días pasan mentres a súa obsesiva nai o sobreprotexe e o educa cun malsán amor/odio. O único contacto que mantén con outras persoas é con Iria, unha xoven educadora social do Estado da que está inocentemente namorado, e con Pedro, un vello pescador experimentado que semella ser o único ser humano que habita na zona. Amancio escapa decote do seu enfermizo fogar e converte as abruptas paisaxes da costa galega no seu mundo privado.
Nunha praia próxima atopa os máis variados obxectos rexeitados a diario polo mar, e escóndeos nunha cova e só el coñece. Ese lugar é seu templo, onde pasa horas construíndo o seu rico mundo interior. Unha mañá, nun dos seus habituais paseos pola praia, Amancio atopa unha estraña caixa que semella conter algo misterioso no seu interior. Hipnotizado polas súas formas case sobrenaturais, escóndea como o maior dos seus tesouros. Non tardará en darse conta de que dous membros dunha organización criminal, Santos e Woyzeck, acoden ao lugar co obxectivo de conseguila a toda costa.
Debido as súas crúas vivencias familiares, á falta de cariño que recibiu e á violencia que sufriu por parte dos seus pais, Amancio creará un mundo acorde a súa mentalidade perturbada no que conflúen realidade e fantasía, ata o punto de non poder discernir entre personaxes reais e imaxinarias.
AS PERSONAXES
Elvira
Rosa Álvarez
Pedro
Fernando Morán
Santos
Ricardo de Barreiro
Woyzeck
Farruco Castromán
Sandra Iglesias
Iria
O PROXECTO
O proxecto SEA BEASTS ven impulsado pola fascinación que nos produce o mar. Aparentemente máis achegados ao chan, cos pés na Terra, os habitantes do interior sentimos un certo mareo espiritual ao contemplar o sublime do océano. Toda esa cantidade de auga, chea de vida e de morte continuamente mesturada, de tremente violencia, de incontrolable fermosura, fainos ver o pequenos que somos en realidade, como ben sabían os primeiros paisaxistas románticos do Século XIX, pero tamén coa audacia dos vellos exploradores, e incita a que descubramos todo un mundo cheo de riquezas que nos agardan nas inmensidades do mar. Esa mesma audacia que fai que os mariñeiros se adentren nese monstro e que sobrevivan nel para arrebatarlle os seus froitos e regresar sans e salvos ao fogar.
Contemplar a grandeza do océano motivounos para introducirnos no descoñecido, para dominar ese mareo espiritual, e iso reflíctese na necesidade de realizar unha historia de ficción que tivese como tema, como leiv motiv, e incluso como personaxe principal, o Mar. Ese Mar con maiúsculas ao que lle canta nos seus versos o poeta galego Manuel Antonio.
Pero quixemos que ese mar fose a antítese das plácidas praias caribeñas, cas súas augas tranquilas. O noso mar, e sen ánimo de ser pretenciosos, é un lugar complexo, poliédrico. Un reflexo do ser humano.
Con SEA BEASTS retratamos unha mínima parte da complexidade humana, con toda a súa primitiva violencia, coa ambición, a desesperanza, a necesidade, o amor... Amosamos a paisaxe como un retrato, e retratamos ao ser humano como parte da paisaxe.
Entusiasmados polo proxecto, tentamos descubrir máis sobre ese litoral que sentimos toda a vida a distancia, recompilando datos, viaxando e investigando, tanto nas costas galegas coma nas do noso propio mar interior. Eses lugares accidentados, cheos de sutís contrastes, de escarpados niveis, dun mar furioso e sen compaixón, é o referente propio para describir a natureza humano ao límite. Incluso alguén que nunca vira o mar de cerca aceptaría esa metáfora como válida, como algo estrañamente representativo dos conflitos que vive no seu interior día a día.
Visioners Entertainment S.L.